Ante as dúbidas xurdidas sobre o alcance do establecido na Base segunda e na Base sétima da Resolución do 18 de febreiro de 2009 pola que se convoca o concurso-oposición para o ingreso en diversas categorías de persoal estatutario do Servizo Galego de Saúde, en relación cos requisitos para poder participar pola quenda de promoción interna (Base segunda) e coa exención do segundo exercicio de carácter práctico de ordenador (Base sétima), cómpre facer as seguintes consideracións:

1º.- Para poder concorrer ao proceso selectivo pola quenda de promoción interna é necesario reunir os seguintes requisitos: (artigo 26 do Decreto 206/2005, do 22 de xullo)

a) Ter a condición de persoal estatutario fixo doutra categoría de nivel académico igual ou inferior ao daquela á que se pretende acceder.

b) Estar en servizo activo en institucións sanitarias do Servizo Galego de Saúde, e con nomeamento como persoal estatutario fixo durante, polo menos, dous anos na categoría de procedencia.

Segundo o anterior para que o persoal estatutario fixo do Servizo Galego de Saúde poida acceder pola quenda de promoción interna a outra categoría de igual ou superior nivel para a que ten a titulación necesaria ten que ter prestados, polo menos, dous anos de servizos prestados en propiedade na categoría en institucións sanitarias do Servizo Galego de Saúde e atoparse, no prazo de presentación de instancias, en situación de activo na mesma nunha institución sanitaria do Servizo Galego de Saúde.

Pola tanto, calquera propietario/a dunha categoría que teña prestados servizos efectivos para o Servizo Galego de Saúde durante, polo menos, dous anos na mesma (aínda que non sexan inmediatamente anteriores á data da convocatoria) poderá participar nesta quenda sempre que estea en situación de servizo activo na devandita categoría nunha institución do Servizo Galego de Saúde no prazo de presentación de solicitudes, e se manteña na devandita situación ata a toma de posesión como persoal estatutario da nova categoría (parágrafo primeiro da Base segunda da convocatoria).

2º.- En canto a exención do segundo exercicio de carácter práctico de ordenador, a Base sétima establece que os aspirantes que participen na quenda de promoción interna que pertenzan á categoría do grupo auxiliar da función administrativa e aspiren a acceder á categoría de persoal de servizos xerais así como os aspirantes que pertenzan á categoría de persoal de servizos xerais que aspiren a acceder á categoría do grupo auxiliar da función administrativa, estarán exentos de realizar o segundo exercicio de contido práctico co ordenador.

De acordo co anterior, para quedar exento da realización do segundo exercicio de carácter práctico de ordenador será suficiente que a persoa sexa propietaria da categoría do grupo auxiliar da función administrativa ou de persoal de servizos xerais e aspire a acceder, pola quenda de promoción interna, á categoría de persoal de servizos xerais ou do grupo auxiliar da función administrativa, respectivamente, sen necesidade de participar nesta quenda desde a categoría do grupo auxiliar ou de persoal de servizos xerais. É dicir, se unha persoa cumpre os requisitos para participar pola quenda de promoción interna por ser propietaria dunha categoría que non sexa a do grupo auxiliar da función administrativa ou de persoal de servizos xerais, por exemplo celador, pero ademais é propietario (en situación de excedencia) da categoría do grupo auxiliar da función administrativa ou de persoal de servizos xerais, quedará exento da realización do devandito exercicio.

A xustificación desta exención é que un aspirante que xa superou o exercicio de ordenador para adquirir a condición de estatutario fixo da categoría do grupo auxiliar da función administrativa ou de persoal de servizos xerais, non teña que volver a superar este exercicio para acceder á categoría de persoal de servizos xerais ou do grupo auxiliar da función administrativa respectivamente, cando participe na quenda de promoción interna, con independencia de que a súa participación na devandita quenda sexa desde aquelas categorías ou desde outras para as que cumpre os requisitos para a devandita participación.